ACTIVIDAES

ESCOMENCIPIA L'ACTIVIDÁ DE FACENDERA NAS COMARCAS ZAMORANAS.

Na localidá de Villadeciervos habrá llugar, nos primeros días del mes d'abril, un aconceyamientu de representantes de Facendera pola Llingua con dellas personas colas que venimos calteniendo contautos nos últimos meses. L'oxetivu ye constituyir una delegación de la nuesa asociación que trabaye na reivindicación de la llingua nas comarcas zamoranas de Senabria, Aliste y La Carbayeda. Los contautos aniciáronse va yá dalgunos meses cuando Xavi López, que ye quien coordina l'aición de Facendera nesta zona entamóu una anicitiva na web chamada "Zamoranos pola Llingua" y que llevóu a la realización d'un cursu d'Introducción al estudiu de la llingua asturllionesa en Puebla de Senabria, nel que la Xunta Direutiva vinía trabayando dende'l branu. El cursu cuntóu con xente nun solo de Senabria, y abriéu las puertas pa la formación d'un grupu de trabayu. Agora, cola reunión del viniente mes, preténdese dar un emburrión definitivu a la nuesa reivindicación y encadarmar dafeitu'l dominiu llingüísticu con coleutivos averaos a la realidá social y cultural del mesmu.

Xudí González, Xandru García y Xavi López en Santa Cruz de Cuérragos (Zamora) xunta la frontera con Portugal.

Cursos 1.999

Astorga
Continúan los cursos d'afondamientu que dende'l mes de noviembre vienen poniéndose na capital maragata. Las clases tienen llugar nel colexu González Álvarez, los xueves a las siete y media. La previsión ye de que s'allarguen a lo menos hasta xunu.

La Junta
L'asociación tien sollicitao una subvención ante la Junta de Castiella y de Llión pal desendolcu d'hasta 29 cursos pa esti añu. Las localidaes au se pretende chegar son tolas mayores de cinco mil habitantes de la provincia de Llión, anque nun se descarta repitir la esperiencia del añu pasáu desenrollada na Puebla de Senabria.
El presupuestu que s'estimóu pa la súa realización ye de más dous millones de pesetas de los que menos d'un millón debería ser aportáu pola Junta. Nun se puede dicir que seya una cantidá enforma ellevada, más teniendo en cuenta que lo que las instituciones autonómicas destinan pal cumplimientu del mandatu constitucional sobre la defensa y protección de las "modalidaes llingüísticas" de la comunidá autónoma ye cero.

Y LLUEU DIREMOS A MADRÍ...
Yá tamos trabayando nello. Un bon garrapiellu xente, llioneses residentes en Madrí, tien especial esfoutu en que tenga llugar dalgún alcuentru ou cursu na ciudá castellana.
La idega d'aniciu ye entamar una Xornada de Llingua y Cultura Llionesa na que l'asociación aproveitará pa esponer los sos oxetivos a tolos interesaos y que podia ser la base pa desenrollar un cursu de llingua asturllionesa.
La colonia llionesa nesta ciudá ye lo suficientemente significativa pa que l'esfuerciu pague la pena.

COLLABORAMOS COL SELMANARIU LES NOTICIES.

Dende'l mes d'ochobre dellos miembros de la nuesa asociación collaboran col selmanariu uvieín "Les Noticies". Esta espublización ye la primera qu'afronta'l llabor periodísticu y la información de calter xeneral emplegando dafechu la nuesa llingua. Nacida en 1.996, la so presentación pública tevo llugar precisamente a lo llargo de la celebración de los primeros Alcuentros nel Cordal nel Brañil.lin. Dende entós vien consolidando la so presencia dientro del mercáu periodísticu asturianu. Sicasí, dicagüei caltenía una importante llaguna sobre las cuestiones referentes a la fastera sur del dominiu, en concretu de las provincias de Llión y Zamora. La collaboración qu'agora escomencipia ta refiriéndose fundamentalmente a información de xacer cultural, llingüísticu y social, anque n'opinión de las personas que llevan la corresponsalía, nun piensa dexase de llau'l tratamientu axustáu de la especial situación política de Llión y Zamora.

Calca eiqui pa dir al índiz