En deillas fasteiras de la provincia de Zamora caltiense on la vieya llengua llionesa, que tamién conozse polos nomes de asturllionés, asturianu y bable.

Magar que hai sieglos debiéu espardise por tola provincia, sigún somos a ver por deillos datos cumu la presencia d’un testu nesta llengua con data’l sieglu XI nu conceyu de Vezdemarbán, prácticamente na raya con Valladolid ou’l caltenimientu de vocableiru llionés que se da nas fasteiras orientales cumu la Tierra de Toru, nu léxicu’l campu semánticu de la vide.

La situación anguañu del bable en Zamora seiría la que vien darréu: Un altu grau de caltenimientu na Senabria Oriental (dende la Portiella del Padornelo p’eiqui), al este fálanse dialectos gallego-pertueses; y al este la redolada d’Aliste, con abonda influencia pertuesa sobro tou nu léxicu, nu restu d’Aliste, la Carbayeda, oeste de Sayagu, urrieta de Vidriales, oeste la urrieta de Tera, Tierra d’Alba y oeste de Tierra de Tábora fálase un "amestáu", mecíu de castellanu ya llionés pero cona personalidá d’este cabeira, onque sigún vamos escontra’l oriente las características llionesas van desiguándose más; pero lo más esmolizante ye que sólu fálase ente la xente mayor, polo que son urxentes las posibles mididas pal sou caltenimientu.

Esta llengua, que tamién ye la fala propia’l norte y oeste de Llión, tou Asturies y l’arredolada pertuesa de Miranda’l Doiru (u conozse pol nome de mirandés ya ye oficial xunta col pertués), tien ente outras las siguientes características:

• Palatización de la l d’entamu: lluna, lluz, asturllionés; lua, luz, gallegu; luna, luz, cdastellanu.
• Diptongo en e y u breves llatinas, mentes el gallegu nun lu fai: terra, porta, vello (gallegu); tierra, puerta, vieyu (asturllionés); tierra, puerta, viejo (castellanu).
• Caltenimientu de la f de niciu llatina: fornu, formiga.
• Mantenimientu de los diptongos decrecientes, en comuña col gallegu: ou, ei: cousa, ferreiru (sólu nel bloque dialeutal occidental).